أسرع خطة علشان تخسر فلوسك

افترض معايا إنك فاتح مصنع ملابس والدنيا ماشية معاك وبتكسب كويس. فجأة صاحبك ييجي يقولك يا عم المطاعم بتكسب وفيها رزق حلو  يلا نفتح مطعم فأنت اتحمسّت وقلت يلا بينا وفي الآخر مبروك خسرت مصنع الملابس وخسرت المطعم وخسرت فلوسك.

ليه؟ عشان أول استراتيجية من استراتيجيات النمو بتقول: كبّر في سوقك الأول. يعني لو انت شغال في الملابس طوّر في مجالك ده قبل ما تفكر تروح مجال تاني.

تعال مثال تاني  إنت مصنع ملابس بتبيع جملة للمحلات. جيت تقول طب ما أنا أفتح محل و أبيع قطاعي. هنا بتعمل حاجة اسمها تكامل أمامي. المشكلة إنك كده بتنافس عملائك اللي هما المحلات فطبيعي مش هيشتروا منك تاني وتلاقي نفسك لا المحل شغّال ولا المصنع بيبيع وخسرت من هنا وهنا.

فيه برضه حاجة اسمها تكامل جانبي يعني تشتري مصنع ملابس تاني زيك. هنا ممكن تعدي وتكسب لكن فيه خطر إن المنافسين يتحدوا عليك و يقللوا من نفوذك في السوق.

أما التكامل الخلفي فده لما تفتح مصنع خيوط أو قماش علشان تورّد لنفسك. المشكلة؟ الموردين اللي كنت بتشتري منهم هيشوفوك بتنافسهم وممكن يتفقوا مع عملائك إنهم ما يشتروش منك فتيجي تقع وانت فاكر إنك بتأمن نفسك.

الخلاصة:

قبل ما تاخد أي خطوة في البيزنس لازم تدرسها كويس وتفهم استراتيجيات النمو الخمسة وكمان القوى التنافسية الخمسة لمايكل بورتر. عشان متلاقيش نفسك بتخسر وانت فاكر إنك بتكبر.